كيف اتعلم البرمجة - 13 نصيحة لازم تعرفهم لتتعلم البرمجة

كيف اتعلم البرمجة – 13 نصيحة لازم تعرفهم لتتعلم البرمجة

انتشرت الفترة الاخيرة كثير من المنشورات و التدوينات التي تتكلم عن البرمجة و كيف تتعلم البرمجة ..
وللأسف كثير منها به معلومات مغلوطة و أغلبها تدوينات لأشخاص خارج المجال اصلا أو مجرد مبتدئين ..
في هذه المقالة سوف نحاول عرض الموضوع من وجهة نظر شخص يعمل في المجال من سنين و سيقوم بالاجابة علي اغلب الاسئلة التي تدور في دماغ أغلب الناس اللي بادئة جديد
قبل الكلام عن أي شيئ في البرمجة .. يجب ان تعرف اني تركت البرمجة ٣ مرات لاني كنت مستصعبها . فحاولت كثيرا ، وفشلت عادي جدا
الحمد لله انا الان خبرة في أكتر من لغة و بدرب طلاب و مبرمجين في شركات و الوضع اختلف تمام فالخلاصة حاول ياصديقي ولا تقلق ان اخفقت مرة بعد مرة ، من الممكن ان تنجح في الثالثة عشان كدا قررت اعملكم المقال اللي انت بتقرأه دا كيف تتعلم البرمجة – 13 نصيحة لازم تعرفهم لتتعلم البرمجة

محتويات المقالة عرض

هل البرمجة صعبة؟

الاجابة المختصرة : لا بكل تأكيد
البرمجة مثل أي مجال جديد بتقابلك صعوبات كتير في الاول .. كل ما بتحاول و تستمر الموضوع بيتحسن معاك
يوم بعد يوم و المشاكل بتتحل .. المهم يكون عندك حافز مخليك مكمل .. ولازم تكون حاببها

المدة التي يجب علي ان ادرسها حتي اتعلم البرمجة ؟

الموضوع لا يقاس بالوقت علي قدر ما يقاس بكمية المجهود المبذول ” انت بتبذل مجهود أد ايه” ..
مثال.. شخص محدد لنفسه وقت اسبوعي غير الشخص اللي مخصص وقت يومي هكذا..
ملحوظة:
اوعي تتخدع و تخلص مستوي كامل في يومين لانك و انت بتتابع الدروس ستجد نفسك فاهم لمحتوي الكورس و عمال تعدي فيديوهات من غير ما تطبق او بتاخد كمية كبيرة في وقت صغير لمجرد انك فهمتها الا انك للأسف بعد يومين او ثلاثة ستجد نفسك قد نسيت وتبدأ من اول وجديد ..
لا تستعجل واعطي كل حاجة وقتها وما تتابعش كمية كبيرة في وقت صغير .. وطبق كل حاجة بايدك وشوف أمثلة كتير جدا علي اد ما تقدر

كيف اتعلم البرمجة بشكل صحيح؟

البرمجة انا بقسمها جزئين :
1 -انك بتتعلم قواعد اللغة (syntax)
2 -انك تتعلم ازاي تبرمج (Logic )
غلطة كبيرة أي حد جديد في البرمجة بيعملها انه بيتعلم اساسيات اللغة و ازاي يكتب الكود و يقف
أو يروح يدرس المستوي الاول في لغة برمجة ويقف ..
انت كده اتعلمت ازاي تكتب كود لكن ما اتعلمتش ازاي تبرمج.
لغة البرمجة انا بشبهها بالظبط كأنك بتتعلم لغة زي اللغة الالمانية
مثال ..
بتبدأ بانك تتعلم الحروف و قواعد اللغة “بس لسة مش قادر تتكلم”
بعد كده بتبدأ تعرف كلمات و ما زلت برضه مش عارف تتكلم
مع الوقت و الاستمرار و التدريب بتقدر تكون جمل بسيطة بس ما زال النطق سئ..
مع الممارسة و الاستمرار بيبدأ النطق يتحسن و تتكلم
كذلك البرمجة :
بتتعلم الاساسيات و كتابة لغة البرمجة وقواعدها سواء لوحدك أو في كورس ..
بعد كده بتبدأ تعمل حاجات بسيطة (ولو بالتقليد)..
مع الاستمرار وهكذا تتغلب علي المشاكل و الموضوع بيتحسن مرة بعد مرة و بتكتسب خبرة
المقصود انه لا تعتقد انك لو فهمت قواعد اللغة انك كده بدأت تبرمج او اتعلمت برمجة .. و للأسف أغلب المبتدئين يقعون في هذه المشكلة ..
في مراحل بتمر عليها بنسميها مراحل التوهان ستجدها وتجد حلولها في الاسئلة القادمة

هل لو كنت مستصعب البرمجة في الدراسة في فرصة تانية أتعلمها صح؟

للاسف أغلب الدراسة الاكاديمية بتدرس البرمجة غلط .. و معظم اللي بيشرحوا برمجة في الجامعات غير مؤهلين أو بيتشرح فقط مجرد أساسيات .. فيكون مجمل اللي اتعلمته فقط هي قواعد اللغة .. وده بياخدنا للمشكلة اللي اجبنا عليها فوق .. انت اتعلمت syntax لكن ما اتعلمتش ازاي تبرمج ..
ممكن تبدأ بداية جديدة مع البرمجة بشكل صحيح و تتعلم و تتفوق فيها كمان .. المهم انك تكون حابب الموضوع و تستمر وعندك حافز

هل يجب ان اتعلم الحساب والرياضيات حتي اتعلم البرمجة؟

الاجابة المختصرة بنسبة 85 % لا
أغلب الشغل اللي بيتطلب منك مش متطلب انك تكون شاطر و متقدم في الرياضة .. لكن في نوعيات من البرمجيات (وليكن مثال هتستخدم فيها networks neural )بتحتاج بعض العمليات الرياضية .. و في حاجات معينة بتبقي فيها حسابات و بتطلب منك حسابات رياضية زي برامج الكونترول و كده ..
بس زي ما قولت نادر جدا جدا لما يتطلب منك حاجة محتاج خلفية كبيرة في الرياضيات .. وبالتالي مش هتكون عائق فيطريق انك تتعلم برمجة بدليل ان في أطفال بتتعلم

هل يجب ان أكون في هندسة أو حاسبات و معلومات حتي اتعلم البرمجة؟

الاجابة المختصرة : لا
انا طول مشوار التدريب من 2011 لحد دلوقت .. قابلت ناس كتير دراستهم غير متعلقة تماما بالهندسة او البرمجة و مع ذلك متفوقين جدا علي ناس في هندسة .. “انا مهندس ومش شايف أي مشكلة في االعتراف بكده”
الدراسة الاكاديمية في البرمجة بتديك اساسيات .. الميزة بس انها بتديك مواد تانية جنب البرمجة زي الرياضيات
بتساعدك جدا في البرمجة.
يعني انا درست الكترونكس في الكلية و درست رياضيات 4 سنين و مواد خاصة بالكونترول و ألجورزيمات و OS وغيرها .. كل ده ساعدني جدا .. بالرغم من اني درست اساسيات مش تعمق الا انها اعطتني معلومات كويسة فادتني ..
بس عمر ما كانت الدراسة في هندسة او حاسبات هي اللي هتخليك متفوق في البرمجة بدليل ان في أطفال بيبرمجوا
كويس جدا .. و في مبرمجين مشهورين عالميا لم بدخلوا هندسة او لم يدخلوا جامعة اساسا..
يعني من الاخر اللي حابب يتعلم و يدوس هيتعلم .. مفيش حاجة هتعيقك غير نفسك

كيف اتغلب علي كثرة التشتت والتوهان للبدء في المجال؟

في الحقيقة طول مشوارك في البرمجة هيقابلك أكتر من مرحلة توهان :
أول مرحلة هتقابلك بتغلط كتير في كتابة أبسط الاكواد .. و هتبقي متعذب و وتجد الغلطة انك ناسي حرف او حاجة عاملها Capital وهي small أو ناسي semicolon .. لو انت في المرحلة دي فده طبيعي أوي ما تقلقش .. وحل المشكلة دي انك تقرا ال Eror و تراجع الكود بنفسك لحد ما تحله .. وكل ما تكتب بايدك كتير كل ما المشكلة دي هتتخلص
منها بسرعة جدا ..
تاني مرحلة توهان بتيجي بعد الاساسيات .. انك اتعلمت اساسيات بس مش قادر تعمل أبسط الحاجات بنفسك .. ده طبيعي جدا جدا علي فكرة ..”انت اتعلمت syntax بس” .. فمفروض تبدأ تشوف مشروع صغير اوي أوي تلم فيها الاساسيات دي و تشوف ازاي ممكن تدمجها مع بعض..
حاول تعمل حاجات بسيطة أوي في الاول .. واحدة واحدة ستجد الامور بتتحسن .. وقلد عادي جدا في الاول
تالت توهان انك مش قادر تبتكر و بتقلد بس و حاسس انك فاشل علي فكرة طبيعي جدا انك ممكن تقلد في الاول.. البرمجة انت بتبني طوبة فوق طوبة ..
ناخد مثال :
تخيل لو عميل طلب منك أبلكيشن مقالات مثلا.. وانت دوخت علي النت و قعدت اسبوع تدور وتتعلم علشان تعمله وسلمته .. و بعدها باسبوع عميل طلب نفس االبلكيشن .. مش هياخد منك أكتر من 10 دقايق لانك خلاص عرفت فكرته ..
الخلاصة: كل ما تعمل مشاريع كتير وتشوف افكار كل ما الدنيا بتتحسن معاك ..

كيف استطيع حل المشاكل التي تواجهني وانا أبرمج؟

طول طريقك في البرمجة هيقابلك مشاكل .. ده طبيعي أوي .. و المشاكل بتكون أكبر كل ما كان مستواك أعلي و بتعمل برمجيات أعقد ..
بس 99 %من المشاكل اللي قابلتك قابلت ناس قبلك و سألوا عنها .. فاتعود انك تستخدم البحث .. اوعي تسأل حد الا لما تيأس خالص و تجرب كل الحلول و تبحث كويس ..
كل ما يقابلك مشكلة و تحلها بنفسك او تبحث عن حل خبرتك هتزيد .. لكن لو استسهلت و سألت الناس او حد كملك كود صدقني مش هتستفيد أي حاجة .. “اللي بيستسهل ما بيتعلمش”

ما هي أقوي لغة برمجة؟

أقوي لغة برمجة هي اللي تخليك تعمل كل اللي انت عاوزه من غير ما توقفك .. ما تتعبش نفسك في المقارنات اللي مالهاش الزمة .. اتعب نفسك في تطوير مستواك في أي لغة تختارها
كل اللغات تقدر تعمل بيها نفس الحاجات -تعبير مجازي :)-..
ركز انك تتعلم ازاي تبرمج مش ازاي تبرمج بلغة كذا .. و صدقني لو اتعاملت مع لغة البرمجة علي انها مجرد Tool .. سهل أوي أوي تتعلم أي لغة جديدة في وقت قياسي – كل واحد بيبرمج بلغة هيصورلك اللغة اللي بيشتغل فيها كأحسن لغة .. و لحد النهاردة مش فاكر ان قريت مقال محايد
في مقارنة بين لغتين ..
الداء و السيكيورتي مسؤلية المبرمج أكتر من اللغة .. كل ما كنت متمكن من اللغة هتكتب كود محترم

كيف تتعلم البرمجة و تطور من نفسك بعد الأساسيات؟

أفضل طريقة تتعلم بيها انك تعمل مشاريع .. ومن خلال المشاريع دي بتبحث و تتعلم اللي ناقصك .. و تتعلم و تطور من طريقة كتابتك للكود
في البداية ممكن تقلد لحد ما تكتسب خبرة بسيطة و مع الوقت الوضع هيتحسن ..

احتياجات سوق العمل حاليا ؟

السوق الفترة اللي فاتت معتمد بشكل كبير علي الويب و الموبايل..
أغلب الشركات نقلت الانظمة بتاعتها لكلاود و الموبايل أبلكيشن بدأ ياخد حصة كبيرة من السوق..
فلو هتبدأ برمجة من الافضل تاخد طريق من الاتنين

هل البرمجة تحقق عائد مادي مربح ؟

البرمجة من أعلي العوائد في العلم .. بس خلي تركيزك في الاول انك تتعلم و تطور من نفسك ومن طريقة كتابتك للكود أكتر من تركيزك علي الفلوس ..

كيف أبدأ كـ freelancer في البرمجة ؟

فكر كعميل
.. ازاي هيثق فيك و يدفعلك فلوس او يطلب منك شغل من غير ما يشوفلك شغل ع النت ..
يبقي اول خطوة انك تعمل Portfolio محترم تعرض شغلك فيه
اعمل Branding لنفسك و شارك بمعلوماتك و شغلك في كل الـ Communities ..
ممكن تعمل شغل مجاني للناس وتنزله في الاول لحد ما تتعرف ..
لو ليك موقع خاص فدي نقطة في منتهي القوة بالنسبالك ان العميل يوصلك ويوصل لبياناتك و يشوف شغلك اون لاين دائما ..
حاول تشوف مواقع العمل الحر وادخل اختباراتها .. وممكن تبحث عن فيديوهات مهندسة سمر صبحي علي يوتيوب شارحة مواقع الفري لانسر بالتفصيل الممل

ما هي أفضل مصادر أتعلم منها البرمجة؟

الفيديوهات
الفيديوهات المصدر الاول

-في البداية السهل إلي مبتدئ هي الفيديوهات .. ممكن تبدأ بيها و تفهم اساسيات اللغة .. لكن للأسف مش كل حاجة وخصوصا المستوي المتقدم مش بتكون في الفيديوهات ..
الكتب
الكتب
– تاني مصدر هو الكتب .. الكتب منتهي القوة وفيها المعلومات اللي انت محتاجها كلها .. وممكن تجد كتاب كامل بيتكلم عن تقنية واحدة ..
الناس اللي بتتعلم من PDF دي تبطل العادة دي .. قراءة يعني كتب مطبوعة ..-وجهة نظر شخصية-
كويس .. لو تقدر تشتري الكتاب المطبوع تمام ولو مش قادر اشتري الـ PDF واطبعه مش هيكلفك كتير و صدقني الكتاب المطبوع هيفرق معاك كتير ..
– أفضل كتب بحب اقراها هي كتب دار نشرWrox اسلوبها من الاخر بيقولك ازاي تبرمج .. ابحث عن الكتب اللي
تحتاجها بكتابة wrox وبعدها لغة البرمجة اللي عاوزها ..
وفي المقال القادم سننشر لك خارطة الطريق لتعلم البرمجة من الصفر للاحنراف لذا ننصحك بالاشتراك في القائمة البريدية الخاصة بنا ليصلك كل جديد